• 69
• 2026-03-20 14:26:02

India Open Jump Competition 2026 | 2.10 ಮೀಟ‌ರ್ ಎತ್ತರಕ್ಕೆ ಜಿಗಿದು ನಿಶಾದ್ ಕುಮಾರ್‌ ಅದ್ಭುತ ಪ್ರದರ್ಶನ | Speed News Kannada

ಬೆಂಗಳೂರು ಇತ್ತೀಚೆಗೆ ಬೆಂಗಳೂರಿನ ಕೆಂಗೇರಿಯಲ್ಲಿರುವ ಅಂಜು ಬಾಬಿ ಸ್ಪೋರ್ಟ್ಸ್ ಫೌಂಡೇಶನ್‌ನಲ್ಲಿ ನಡೆದ ಎರಡು ದಿನಗಳ ಇಂಡಿಯಾ ಓಪನ್ ಜಂಪ್ ಸ್ಪರ್ಧೆಯಲ್ಲಿ ಭಾರತದ ಹೈ ಜಂಪರ್ ನಿಶಾದ್ ಕುಮಾರ್ ಅವರು 2.10 ಮೀಟರ್ ಎತ್ತರಕ್ಕೆ ಜಿಗಿದು ಅದ್ಭುತ ಪ್ರದರ್ಶನ ನೀಡಿದ್ದಾರೆ. ವಿಶೇಷವೆಂದರೆ, ನಿಶಾದ್ ಅವರು ಈ ಸ್ಪರ್ಧೆಯಲ್ಲಿ ಅಂಗವೈಕಲ್ಯವಿಲ್ಲದ ಸಾಮಾನ್ಯ ಕ್ರೀಡಾಪಟುಗಳ ಜೊತೆ ಸ್ಪರ್ಧಿಸಿದ್ದರು. ಈ ಸ್ಪರ್ಧೆಯಲ್ಲಿ ಅವರು 5ನೇ ಸ್ಥಾನ ಪಡೆದಿದ್ದರೂ, ಅವರ ಜಿಗಿತದ ಎತ್ತರವು ಕ್ರೀಡಾ ವಲಯದಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗಿದೆ. ಈ ಬಾರಿ ನಿಶಾದ್ ಅವರು ಕೇವಲ ನಾಲ್ಕು ಹೆಜ್ಜೆಗಳ 'ಶಾರ್ಟ್ ಸ್ಟೆಪ್ಸ್' ತಂತ್ರವನ್ನು ಬಳಸಿ ಜಿಗಿದಿದ್ದಾರೆ. ಪ್ರಸ್ತುತ 2.14 ಮೀಟರ್‌ಗಳ ವೈಯಕ್ತಿಕ ದಾಖಲೆ ಹೊಂದಿರುವ ಅವರು, ಮುಂಬರುವ ಅಂತರಾಷ್ಟ್ರೀಯ ಸ್ಪರ್ಧೆಗಳಿಗಾಗಿ ಹೊಸ ತಂತ್ರಗಳನ್ನು ಅಳವಡಿಸಿಕೊಳ್ಳುತ್ತಿದ್ದಾರೆ. ಕಳೆದ ಒಂದು ತಿಂಗಳಿನಿಂದ ಅಮೆರಿಕಾದಲ್ಲಿ ತರಬೇತಿ ಪಡೆದು ಬಂದಿರುವ ಅವರು, ಏಪ್ರಿಲ್ ಮೊದಲ ವಾರದಲ್ಲಿ ಮತ್ತೆ ನಾಲ್ಕು ತಿಂಗಳ ಅವಧಿಗೆ ಅಮೆರಿಕಾಕ್ಕೆ ತೆರಳಲಿದ್ದಾರೆ. ಖ್ಯಾತ ತರಬೇತುದಾರ ಜೆರೆಮಿ ಫಿಶರ್ ಅವರ ಮಾರ್ಗದರ್ಶನದಲ್ಲಿ ನಿಶಾದ್ ತಮ್ಮ ಮುಂದಿನ ಗುರಿಗಳಿಗಾಗಿ ಸಜ್ಜಾಗುತಿದ್ದಾರೆ. ಹಿಮಾಚಲ ಪ್ರದೇಶದವರಾದ ನಿಶಾದ್ ಕುಮಾರ್ ಅವರು, ಈಗಾಗಲೇ ಟೋಕಿಯೊ ಮತ್ತು ಪ್ಯಾರಿಸ್ ಪ್ಯಾರಾಲಿಂಪಿಕ್ಸ್‌ನಲ್ಲಿ ಬೆಳ್ಳಿ ಪದಕ ಗೆದ್ದು ದೇಶಕ್ಕೆ ಕೀರ್ತಿ ತಂದಿದ್ದಾರೆ.
ಸಾಮಾನ್ಯ ಕ್ರೀಡಾಪಟುಗಳ ಜೊತೆಗಿನ ಸ್ಪರ್ಧೆಯು ನನ್ನ ಸಾಮರ್ಥ್ಯವನ್ನು ಹೆಚ್ಚಿಸಿಕೊಳ್ಳಲು ಮತ್ತು ಉತ್ತಮ ಲಯ ಕಂಡುಕೊಳ್ಳಲು ಸಹಕಾರಿಯಾಗಿದೆ. 2022 ರಲ್ಲಿಯೂ ಗುಜರಾತ್‌ನಲ್ಲಿ ನಡೆದ ಸ್ಪರ್ಧೆಯಲ್ಲಿ ಸಾಮಾನ್ಯ ಕ್ರೀಡಾಪಟುಗಳೊಂದಿಗೆ ಸ್ಪರ್ಧಿಸಿದ್ದೆ ಎಂದು ನಿಶಾದ್ ಅವರು ಹೇಳಿದ್ದಾರೆ. ಈ ಸ್ಪರ್ಧೆಯ ಫಲಿತಾಂಶ ನನಗೆ ಮತ್ತಷ್ಟು ಪ್ರೇರಣೆ ನೀಡಿದೆ. ನಾಲ್ಕು ಹೆಜ್ಜೆಗಳ 'ಶಾರ್ಟ್ ಸ್ಟೆಪ್ಸ್ ತಂತ್ರ ಬಳಸಿ ಜಂಪ್ ಮಾಡಿದ್ದ. ಅದಕ್ಕೆ ಅನುಗುಣವಾಗಿಯೇ ತರಬೇತಿ ಪಡೆದಿದ್ದೆ. ನನ್ನ ಗುರಿಯ ಬಗ್ಗೆ ಏನನ್ನೂ ಹೇಳುವುದಿಲ್ಲ. ಕೆಲವೊಮ್ಮೆ ಅದು ತಪ್ಪಾಗಿಯೂ ಅರ್ಥೈಸಬಹುದು. ಈ ಬದಲಾವಣೆ ನನಗೆ ಫಲತಾಂಶ ನೀಡುತ್ತಿದೆ. ಏಪ್ರಿಲ್ ಮೊದಲ ವಾರದಲ್ಲಿ ಮತ್ತೆ ಅಮೆರಿಕಾಕ್ಕೆ ತೆರಳಿದ್ದು, ಅಲ್ಲಿ ನಾಲ್ಕು ತಿಂಗಳು ತರಬೇತಿ ಪಡೆಯಲಿದ್ದೇನೆಂದು ತಿಳಿಸಿದ್ದಾರೆ. ನಿಶಾದ್ ಅವರು ಕೇವಲ 8 ವರ್ಷದವರಿದ್ದಾಗ ಹೊಲದಲ್ಲಿ ಹುಲ್ಲು ಕತ್ತರಿಸುವ ಯಂತ್ರಕ್ಕೆ ಸಿಲುಕಿ ತಮ್ಮ ಬಲಗೈ ಕಳೆದುಕೊಂಡಿದ್ದರು. ಈ ದುರಂತವು ಅವರ ಜೀವನವನ್ನೇ ಬದಲಿಸಿತು.
ನಿಶಾದ್ ಅವರ ತಂದೆ ರತ್ನಾಲ್ ಸಿಂಗ್ ಒಬ್ಬ ರೈತರಾಗಿದ್ದರೆ, ತಾಯಿ ಪುಷ್ಪಾ ದೇವಿ (ವಾಲಿಬಾಲ್ ಮತ್ತು ಡಿಸ್ಕಸ್ ಥೋ) ಕ್ರೀಡಾಪಟುವಾಗಿದ್ದಾರೆ. ತಾಯಿಯ ಪ್ರೋತ್ಸಾಹದಿಂದಾಗಿ ನಿಶಾದ್ ಚಿಕ್ಕ ವಯಸ್ಸಿನಿಂದಲೇ ಕ್ರೀಡೆಯಲ್ಲಿ ಆಸಕ್ತಿ ಬೆಳೆಸಿಕೊಂಡಿದ್ದರು. ಆರಂಭದಲ್ಲಿ ಅವರು ಸಾಮಾನ್ಯ ಕ್ರೀಡಾಪಟುಗಳ ಜೊತೆಯೇ ಸ್ಪರ್ಧಿಸುತ್ತಿದ್ದರು. 2017ರಲ್ಲಿ ಪ್ಯಾರಾ ಅಥ್ಲೆಟಿಕ್ಸ್ ಬಗ್ಗೆ ತಿಳಿದ ನಂತರ ಆ ವಿಭಾಗದಲ್ಲಿ ವೃತ್ತಿಜೀವನ ಮುಂದುವರಿಸಲು ನಿರ್ಧರಿಸಿದರು.

Author:

ಎಚ್‌. ಮಾರುತಿ

ಪತ್ರಿಕೋದ್ಯಮದಲ್ಲಿ ಮೂರು ದಶಕಗಳ ಅನುಭವ ಹೊಂದಿದ್ದು, ದೃಶ್ಯ ಮತ್ತು ಮುದ್ರಣ ಮಾಧ್ಯಮದಲ್ಲಿ ಪರಿಣಿತಿ ಪಡೆದಿದ್ದಾರೆ. ರಾಜಕೀಯ, ದೇಶ, ಅಂತಾರಾಷ್ಟ್ರೀಯ ವಿದ್ಯಾಮಾನಗಳಲ್ಲಿ ವಿಶೇಷ ಆಸಕ್ತಿ. ರಾಜಕೀಯ ವರದಿಗಾರಿಕೆಯಲ್ಲಿ ಪಳಗಿರುವ ಇವರು ಕುಳಿತಲ್ಲೇ ಸುದ್ದಿಯನ್ನು ಹೆಕ್ಕಿ ತೆಗೆಯಬಲ್ಲ ಛಾತಿ ಹೊಂದಿದ್ದಾರೆ. ಸಾಹಿತ್ಯ ವಿದ್ಯಾರ್ಥಿಯಾದ ಇವರು ಕನ್ನಡ ಮತ್ತು ಇಂಗ್ಲೀಷ್‌ ಸಾಹಿತ್ಯದ ವಿದ್ಯಾರ್ಥಿಯಾದ ಇವರು ಉತ್ತಮ ಓದುಗರೂ ಹೌದು.

Author Details