- Bengaluru: Clear, 27.1°C
- About Us
- Contact Us
2026-04-24 12:21:11
ಸಾಮಾನ್ಯವಾಗಿ ಮಾವಿನ ಹಣ್ಣುಗಳ ಬೆಲೆ 500 ರಿಂದ 2000 ರೂಪಾಯಿಗಳ ನಡುವೆ ಇರುತ್ತದೆ. ಆದರೆ ವಿಜಯಪುರ ಜಿಲ್ಲೆಯ ಇಂಡಿ ಪಟ್ಟಣದಲ್ಲಿ ಒಂದು ಕೆಜಿ ಮಾವು 1 ಲಕ್ಷ ರೂಪಾಯಿಗೆ ಮಾರಾಟವಾಗಿರುವುದು ಎಲ್ಲರನ್ನೂ ಅಚ್ಚರಿಗೊಳಿಸಿದೆ.ಇದು ಸಾಮಾನ್ಯ ಮಾವಲ್ಲ, ಜಪಾನ್ ಮೂಲದ ಮಿಯಾಝಕಿ ತಳಿಯ ಮಾವು. ಅನಂತ ಮತ್ತು ರಾಜಶ್ರೀ ದಂಪತಿಗಳು ತಮ್ಮ ತೋಟದಲ್ಲಿ ಬೆಳೆದ ಈ ವಿಶೇಷ ಮಾವು ಇದೀಗ ಭಾರೀ ಬೆಲೆ ಪಡೆದುಕೊಂಡಿದೆ.
20 ವರ್ಷಗಳ ಹಿಂದೆ ಖರೀದಿಸಿದ್ದ ಬಂಜರು ಭೂಮಿಯನ್ನು ಹಸಿರಿನ ತೋಟವನ್ನಾಗಿ ರೂಪಿಸಿದ ಈ ದಂಪತಿಗಳು, ಆಂಧ್ರಪ್ರದೇಶದ ರಾಜಮಂಡ್ರಿಯಿಂದ ಸುಮಾರು 25 ಮಿಯಾಝಕಿ ಸಸಿಗಳನ್ನು ತಂದು ನೆಟ್ಟಿದ್ದರು. ಪ್ರತಿ ಸಸಿಗೂ ಸುಮಾರು 10 ಸಾವಿರ ರೂಪಾಯಿ ವೆಚ್ಚ ಮಾಡಲಾಗಿತ್ತು.ಈ ತಳಿ ಈ ಪ್ರದೇಶದಲ್ಲಿ ಬೆಳೆಯುತ್ತದೆಯೇ ಎಂಬ ಆತಂಕ ಇದ್ದರೂ, ಈಗ ಪ್ರತಿ ಗಿಡವೂ 25 ರಿಂದ 30 ಹಣ್ಣುಗಳನ್ನು ನೀಡುತ್ತಿದೆ. ಕಳೆದ ವರ್ಷ ಕುಟುಂಬದವರೇ ಈ ಹಣ್ಣುಗಳನ್ನು ಸವಿದರೆ, ಈ ಬಾರಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿದ ಚಿತ್ರಗಳು ವೈರಲ್ ಆಗಿ ದೇಶದ ವಿವಿಧ ಭಾಗಗಳಿಂದ ಬೇಡಿಕೆ ಹೆಚ್ಚಾಗಿದೆ.
ಕೊಲ್ಕತ್ತಾ ಮತ್ತು ಮುಂಬೈಯಿಂದ ವ್ಯಾಪಾರಿಗಳು ಸಂಪರ್ಕಿಸಿ ಹೆಚ್ಚಿನ ಬೆಲೆ ನೀಡಲು ಸಿದ್ಧರಾಗಿದ್ದಾರೆ. ವಿದೇಶಗಳಲ್ಲಿ ಈ ಮಾವಿಗೆ ಇನ್ನಷ್ಟು ಬೇಡಿಕೆ ಇದ್ದು, ಒಂದು ಕೆಜಿಗೆ 2 ರಿಂದ 2.5 ಲಕ್ಷ ರೂಪಾಯಿವರೆಗೆ ಮಾರಾಟವಾಗುತ್ತಿದೆ ಎಂಬ ಮಾಹಿತಿ ಲಭ್ಯವಾಗಿದೆ.ಈ ಸಾಧನೆ ಮೂಲಕ ಬಂಜರು ಭೂಮಿಯನ್ನೇ ನಂದನವನವನ್ನಾಗಿ ಮಾರ್ಪಡಿಸಿದ ಅನಂತ-ರಾಜಶ್ರೀ ದಂಪತಿಗಳು ಇದೀಗ ಎಲ್ಲರ ಗಮನ ಸೆಳೆದಿದ್ದಾರೆ.ಒಟ್ಟಿನಲ್ಲಿ, ಅಪರೂಪದ ಮಿಯಾಝಕಿ ಮಾವಿನ ಬೆಲೆ ಮತ್ತು ಬೆಳವಣಿಗೆ ಜಿಲ್ಲೆಯ ಜನರಲ್ಲಿ ಕುತೂಹಲ ಮೂಡಿಸಿದ್ದು, ಕೃಷಿಯಲ್ಲಿ ಹೊಸ ಅವಕಾಶಗಳತ್ತ ದಾರಿ ತೋರಿಸುತ್ತಿದೆ.
ಪತ್ರಿಕೋದ್ಯಮದಲ್ಲಿ ಮೂರು ದಶಕಗಳ ಅನುಭವ ಹೊಂದಿದ್ದು, ದೃಶ್ಯ ಮತ್ತು ಮುದ್ರಣ ಮಾಧ್ಯಮದಲ್ಲಿ ಪರಿಣಿತಿ ಪಡೆದಿದ್ದಾರೆ. ರಾಜಕೀಯ, ದೇಶ, ಅಂತಾರಾಷ್ಟ್ರೀಯ ವಿದ್ಯಾಮಾನಗಳಲ್ಲಿ ವಿಶೇಷ ಆಸಕ್ತಿ. ರಾಜಕೀಯ ವರದಿಗಾರಿಕೆಯಲ್ಲಿ ಪಳಗಿರುವ ಇವರು ಕುಳಿತಲ್ಲೇ ಸುದ್ದಿಯನ್ನು ಹೆಕ್ಕಿ ತೆಗೆಯಬಲ್ಲ ಛಾತಿ ಹೊಂದಿದ್ದಾರೆ. ಸಾಹಿತ್ಯ ವಿದ್ಯಾರ್ಥಿಯಾದ ಇವರು ಕನ್ನಡ ಮತ್ತು ಇಂಗ್ಲೀಷ್ ಸಾಹಿತ್ಯದ ವಿದ್ಯಾರ್ಥಿಯಾದ ಇವರು ಉತ್ತಮ ಓದುಗರೂ ಹೌದು.